مجموعة مختارة من المواويل العراقية

من يوم عني رحت بكلبي انصبت فاتحة
وقفلت كلبي انا لغيرك فلا فاتحة
هذا الكلب جلورد وحبك اهو فاتحة
حبك نداوة عسل والورد اخذ منك
بس كول ياهاجري اتمنا انا امنك
لاتمن علي شوفتك ما احب انا منك
الي علية يمن بحبي ولا افاتحة

مابان مني ذنب يا صاحبي كـلي شجرى
تنور صار القلب بيده الحبيـب سجرى
وبالقلب نبت عــود الحـــريق شجره
وخيم علي الحــــزن لافراحـــي هدم
وانت الوريد اللي يضخ للقلب هالدم
ما انساك لا وحــك اللي خلـــق ادم
لان احس انـت الغصن وانــــي شجـره

يامن غرامك سرى بمفاصلي وحشاي
واصبحت بهواك هايم بالفلا واحشاي
وان غبت عن ناظري ساعة الك وحشاي
گلي الصبر چيف عن فرگاك كلو الوجن
ارحم لصبي شرد بهواك عگله وجن
او آه صح لي ساعة من وصالك وجن
من ورد خدك دوى لمفاصلي وحشاي

يامن نسيت اللذي ابعمرة الك خاطرة
بالجذب مامر على بالك ابد خاطرة
وانة بدموع الهجر كاتب الك خاطرة
صدكني هذا الكلب غيرك ابد ماهوة
ضل عالي علو النجم حبك ابد ماهوة
بالله اريد اسألك عن السبب ماهوة
الشايل حنينة الك ليش اكسرت خاطرة

راح وكســر خاطري ولملم طيوفه وشال
ونهــر المحبـه نشف ظلت جروفه وشال
الزمــن ماعافنـي رد عالـكفوف وشـل
ماعفت حبــك انا كلبـي على حبـك ظل
عالهجر شو تعتنـي عالوصــل دومك ظل
بجتافي اغطي الشمس بالصيف اصيرن ظل
لو مر عليك الشتا لفني على صدرك شال

مهضوم طول العمر بكل وكت لوعةلي
ومتماشي وية الحجي ان جان الي لو علي
ماهمني ذاك السعة بس فلدرك لوعلي
بس همني ذاك العلة وبقسمتة مرتضة(ما رضة)
ويكلي اميرك فنة وعظامة رض مرتضّة
كتلة انا بشدتي لو مافزع مرتضى
يفزعلي لوابو الحسن لوحيدرة لوعلي

الناس التودني مع الميتين عدوني
و مكسور كلبي و جميع الناس عادوني
ناديت يهل الهوى بالله عيدوني
أبعدعلينا الدرب والحيل مني أنسلب
ولو ماغلاهم ابد دمعي فلا ينسلب
دنزعي ثوب الفرح يا روحي ريتو نسلب
مو تستاهلين الجرى شوداج على الدوني

مسكين هذا الكلب يا صاحبي مره
يا ما سكاك الشهد ما ضوكك مره
يتمنى كبل الاجل يلكاك ولو مره
بس انته كلبك صخر ما لحظه حنيت
وانه لالك ديرتي بيبانها حنيت
من شفت بيك الالم ظهري الك حنيت
طيبتي يم شوفتك وجهك علي مره

اتمنى تعجبكم

» احلى النكات العراقية
» احلى النكات العراقية
» احلى المسجات العراقية
» شرائح السمك المشوي على الطريقة العراقية:
» مجموعة من الحكم و الاشعار القديمة الجميلة